2011-02-09

屬於超人的勵志



但凡勵志東西,都是告訴人,外在的阻力是不能阻撓一個人成功的,例如貧窮、專制和仇恨,都不應是我們退縮的理由,更甚,越多困難,越應該前進,雖千萬人而吾往矣,就是這個意思。因為,這叫做「忠於自己」。

很感動。勵志東西,好像歌曲、電影、電視和小說,這幾十年來,把忠於自己變成一種革命,把夢想和自由說成為青春最重要的寶物,擺脫現實的枷鎖,不管是來自社會體制,還是既得利益者集團,年輕人就是要突破然後成才。這種故事感動過千萬人。

但如果阻礙是源於內在呢?懶惰、愚昩、幼稚和驕傲,又有甚麼勵志的故事可以勉勵我們?沒有。這些阻撓,在電影裏,在故事中,是原罪一樣的存在,比方說一個懶惰的肥仔,整天躲在家裏不工作,自稱是社會上的勝利者,還抱怨父母沒有給他需要的社會優勢,說甚麼「窮人就不要生仔吧」之類的。如果是一個勵志故事,這種角色早就該死掉。

可能你都會覺得,這種肥仔活該的,因為每個人都應該盡力突破實際的困局,解決懶惰的問題,然後再解決外在的問題,這才是勵志。但假如他陷入困局,正是由於自身缺乏意志力,或是根本就沒有才能,又或是誰都不知道他有何才能呢?

勵志,忠於自己,是由於角色本人擅於拳擊,就做了拳師,擅於跳舞,就做dancer,但如果一個人本身就缺乏意志力,他該由甚麼地方開始突破?又或他沒有才能,又可以往哪裏追逐夢想?2011年了,勵志不是不好,但如果貼近我們這種普通人,更好。

話題怎麼而起?就因為《3 Idiots》這套電影,替男主角這類天才鋪排一個完美的奇遇,不是不可以,但隨手就貶低和醜化其他努力的人,並且不屑於分數及成就,然後還是以學業成績及幾百個專利,作為主角正義的證據,唉,印度電影不單載歌載舞令人難受,價值觀還停留在獅子山下的歲月神偷,希望不用看第二次呢。

話說,如果主角很enjoy學習,最後成績差又找不到工作,但他依然自得其樂,這就真的是勵志呢。卓越會伴隨熱愛而來?真的嗎?

The Nok

20 則留言:

匿名 提到...

拜託請不要以為自己很了解這部電影, 你說這電影很爛, 我就說你的"影評"更爛! 你自己根本沒有思考過電影帶出來的信息, 就胡亂作評論

匿名 提到...

同意樓上
究竟樓主你有沒有認真的看過這套電影?

The Nok 提到...

拜託請不要以為自己很了解這段評論, 你說這評論是胡亂, 我就說你的"回應"更爛! 你自己根本沒有思考過評論帶出來的信息, 就胡亂作回應

匿名 提到...

批判必須給出理據。你不指出網主的影評爛在哪裡,只會喊口號,這還不是胡亂評論人家的評論?舉證的責任在你,不知此道理,妄談思考。

如此「無理」取鬧,網主便以子之矛攻子之盾,秒殺之。

匿名 提到...

對.....很同意
話人地錯,就唔該指出來邊度錯.點解錯.
唔通人地話我係錯,我就係錯咩...
都要講下點解我係錯嫁.
係有道理既,就唔該拎出來.唔好好似細路哥嘈交禁樣.
一個原因都冇拎出來,只係一味話人地係錯.

匿名 提到...

我都唔明你地要嘈D乜野,一部印度電影當然係由印度人的角度去拍,自然就緊係O岩印度人去睇去思考,點解要用香港人嘅角度黎評論呢套戲~~

雖然套戲帶出左好多我個人認為"看似簡單但很難實現的理想",但係睇戲唔係好應該去享受戲入面嘅世界咩?

同理心何在~~~
太過認真有何用~~~

The Nok 提到...

> 一部印度電影當然係由印度人的角度去拍,自然就緊係O岩印度人去睇去思考,點解要用香港人嘅角度黎評論呢套戲~~

你講到你好似已經知道咩叫「印度人的角度」咁,真厲害。

> 但係睇戲唔係好應該去享受戲入面嘅世界咩

學習心何在?太過享受有何用?

The Nok 提到...

另外,可能有些人先看這篇文的,給一個延伸閱讀︰
http://gazing-eyes.blogspot.com/2011/09/blog-post_13.html

waichelin 提到...

我是第一位留言的那位,現要指出我對你的"影評"的不是之處。在一開始的幾段我覺得還不錯, 但是最後2段,我就極之不同意,並覺得你根本沒看過電影而寫出來的一樣。


第一,"替男主角這類天才鋪排一個完美的奇遇", 我是極之不同意。電影中並沒有幫主角鋪排一個完美的奇遇,在電影中主角並沒有什麼機緣巧合而導致他的成功,他的成功確實是基於他的聰明,加上靈活變通而得到的。就好像主角第一次踏入校園給學長困在一間房間時,學長要脅要把尿射在主角身上,但主角卻利用學過的知識(鹽水是可以導電的)來給自己解困。這就已經說明了主角的聰明及靈活變通。   另外,有一幕是一位學生發明了一個飛行器,而主角卻想出在這飛行上加上視像攝錄,把一樣玩具變成一樣有用的功具,這都歸功於主角的才智。相信以上這2點已足夠說明主角為何在最後會成位一位發明家了。



第二,"但隨手就貶低和醜化其他努力的人,並且不屑於分數及成就",對於這一句我又極之不同意。導演並沒有貶低或醜化其他努力的人。主角的兩位朋友就是一個很好的例子,他們都是十分努力讀書,而最後一位成為了攝影師,另一位都能找到一份工作。 可能你說"貶低或醜化其他努力的人"是指讀死書的那一位,我認為這是導演想借這個人帶出"死讀書,讀死書"這個道理,即是說學習並不是背誦,而是要吸收並變通。



第三,"印度電影不單載歌載舞令人難受,價值觀還停留在獅子山下的歲月神偷",載歌載舞是印度的文化,你不能因為個人的喜好而寫出如此評論。難道你會覺得導演會因為你自己的個人喜好而選用LADY GAGA 或是陳奕迅的歌做插曲嗎?


最後,說什麼「印度人的角度」云云,除了片中插曲之外,我真的想不到那裡雖要用印度人的角度去欣賞。如果你是香港人的話(我猜你是吧),難道你不覺我情況好像電影中一樣嗎?我不是說香港有很多印度人,而是說當中的教育系統跟香港的差不多,教育不講求明白或是吸收,而只是一味死讀書。相信這不難明白。


這只是我個人看法的一部分,如果你讀完,再想深一層,電影你就不會這樣評論了。

The Nok 提到...

要評論一套電影,首先你要明佢真係想講乜,然後佢舉既例子有冇說服力,還是開了金手指,夾硬用「因為佢成功,所以佢岩」黎自圓其說。

例如「卓越會伴隨熱愛而來」,呢句野主角講的,好似好合理,因為佢鍾意讀,所以呢最後就好勁好成功。

問題係佢本身係一個好窮冇人培養既人,竟然擁有超越一般人既智力、好奇心、勤奮與想像力,兼且仲有個有錢佬請佢代讀唔駛佢搵食。呢個世界有幾多人係咁?用呢個例子講「讀書呢,有熱誠就會有卓越」你覺得有說服力?

就好似朗拿度黎踢南華,一季入你100球,然後就話「踢波呢,最緊要有熱誠囉!」呢d 唔係叫風涼話叫咩?

其實呢個世界上絕大多數人讀書,只能夠明白當中 70% 甚至更少的內容,其他只能靠背,或由得佢,呢個係現實,好多人根本冇才華、冇背景、冇時間去理解果d 困難既部份,大家讀過書應該明,會考拎A 固然好,但拎b、c、d 已經滿足既人先係主流。

可能你會話,喂,果個後尾做左攝影師既咪說明左真係要搵自己興趣囉,但呢個世界有幾多攝影師係可以出書?有才能但最後失敗既人有幾多?如果佢失敗,係咪代表呢條路唔岩?

而且,更加多人根本唔知自己有咩興趣,又或有興趣但冇天份,例如踢波,如是庸庸碌碌就一世,仲妄想以為自己有熱誠就會變成功。相反,果個被丑化既人,佢先係真正了解自己想要乜野,然後努力爭取既人,呢套電影將真係合乎現實既價值觀扭曲晒。

所謂脫離現實,就係將自己心裏面以為岩既價值觀,送晒俾個主角,然後仲煲到佢好成功,順手將唔岩自己諗法既人打成丑角,呢種手法除左叫做老土,都冇其他形容詞。

btw,其實我本人係贊成工作 / 讀書要搵自己既興趣,但唔認為咁樣必然導致成功,相反失敗既機會仲高過一般人,但正正因為呢件事係岩,做左咁樣人生先唔會後悔,唔需要用「成功」去證明,呢d 先叫勵志。呢個故事要用個大成功的天才去說明讀書要搵興趣,真係太過脫離現實。

相反,果一大群冇乜才華既人 (就例如電影班入面大堆路人同學),如果佢地搵到自己既目標,雖然未必岩自己興趣,但都努力過、認真過,都值得欣賞。真正要貶低既,係冇付出過,但唔知點解又好成功既人,呢d 先係問題。

如果你想講套戲係反映現實教育制度既荒謬,我用延伸閱讀果篇回應左。

希望你真係諗深多一層,就會明白呢篇評論講乜。

ps 印度歌舞真係好娘

waichelin 提到...

請你再睇多一次先黎回應我

第一,主角原本係有錢佬既僕人,有錢佬個仔唔鍾意讀書,但係個有錢佬想佢個仔有畢業證書。咁岩主角又鍾意學習,所以有錢佬就Make一個Deal,有錢佬供主角讀書,主角用有錢佬個仔個名幫佢拎張畢業證書。簡單d黎講,即係有錢佬用錢買張證書,大家互相得益,有錢佬個仔有證書,主角有得去聽書。


第二,聰明人發現自己有好多野都唔識,咁梗係會想去知道更加多。愛迪生想知多d就靠實驗,主角想知多d就上堂學。


第三,主角個朋友鍾意影相,咁佢想學多d就去左同個出名既動物攝影師去學野。咁名稍師再加上人既本質好,咁咪成功lo!


第四,你話"其實呢個世界上絕大多數人讀書,只能夠明白當中 70% 甚至更少的內容,其他只能靠背,或由得佢,呢個係現實,好多人根本冇才華、冇背景、冇時間去理解果d 困難既部份,大家讀過書應該明,會考拎A 固然好,但拎b、c、d 已經滿足既人先係主流。"。咁而家套戲咪暗示緊呢個教育系統係唔得嫁lo!!

The Nok 提到...

真係……吹脹

做咩打三段野將成個故事再講一次?其實你明唔明我講緊乜?呢套係講一個超人既成功故事,脫離現實,一廂情願,閉門造車。

呢個教育系統有咩咁唔得?可唔可以講清楚d?朗拿度黎踢南華,然後話「港甲真係好唔得囉」咁?到底係教育系統唔得,定係d 人迷信學歷、社會冇俾其他出路,係邊樣唔得?請你諗清楚先……

waichelin 提到...

香港教育系統真係反映到一個人既話,咁陳易希就應該會考30分啦!如果教育系統得,就唔會有咁多人去外國讀書LA!


你係咁講超人故事,你唔搵SPIDERMAN, BATMAN, SUPERMAN黎比較。你話脫離現實,唔通呢個世界上冇聰明人? Bill Gate唔係靠佢聰明才智+努力開MICROSOFT? 貝爾發明電話唔係靠佢聰明才智+努力? 唔通呢2個人只係傳說?


PS.我果三段野全部都係回應番你不明白既地方

The Nok 提到...

> 香港教育系統真係反映到一個人既話,咁陳易希就應該會考30分啦!

你呢句對白真厲害,講到好似你識得陳易希咁。拿,咁你先睇左延伸閱讀果篇先再講呢個問題。 <--呢句野我前個回覆已經提左。


> 唔通呢個世界上冇聰明人?

唔通呢個世界上大多數都係聰明人?好似男主角咁,又窮又冇得補習都可以又聰明又醒目又有創意又有奇遇唔駛搵食唔駛parttime冇壓力淨係讀書?

一個好似佢咁既條件既人,唔係叫「超人」(superhuman),叫咩?你唔係以為我講緊識超能力果種超人下話?

至於做攝影師果個,至少都叫有才華啦,出書呀大佬,呢個世界有幾多攝影師,只係夠糊口呀?

算啦,原來你以為我唔明套戲講乜,似乎我地直頭唔係同一層次上對話……

waichelin 提到...

陳易希係聰明,但係點解香港教育系統發唔到圍,要去都美國先得?

主角方面麻煩你睇番我上一個REPLY既第2段有解釋點解佢唔駛PART TIME, 仲有你估到到都好似香港補習係一樣好普通既事?

The Nok 提到...

> 陳易希係聰明,但係點解香港教育系統發唔到圍,要去都美國先得?

佢發左咩圍?同埋佢係咩聰明?多元智能入面佢有邊種?語文能力又如何?咁而家佢有冇係香港被扼殺左?佢有冇大學讀?

我夠知個主角點解唔駛做parttime啦,你真係估我冇睇?問題係呢d 咪就叫做奇遇囉,你去一次印度睇下成條街既乞兒先講啦好唔好?你呢d 唔係叫解釋,只係叫做重覆個故事……

***

拿,咁,你真係完全follow 唔到我講乜,轉個形式,當幫你明白︰

你覺得呢個故事帶俾你咩對人生既啟發呢?

waichelin 提到...

陳易希會考中英文唔合格,根本盲就冇機會升到中六,更何況讀大學?雖然佢而家有大學讀,但係佢係點入你真係好似唔知。


陳易希係係佢遠赴美國,憑著他的發明作品——一個智能家居監察用的小型三輪機械車「智能保安機器人」,獲得第55屆美國英特爾國際科學與工程大獎賽物理學二等獎。而因為咁香港大學先收佢。


電影主角有奇遇?冇錯,有D人既人生就係咁。李嘉誠就係因為奇遇先有得黎香港,從而發達。牛頓就係因為奇遇先發現到地心吸力。


唔通你會想睇一套電影係咁:有個聰明人出世,但係佢好窮,冇奇遇,冇書讀,冇野食,冇水飲,之後你就大噗一句,呢套戲真夠寫實!


補充多一點,呢套戲既導演細個都俾父母逼佢讀工程,但係佢堅持要讀電影。結果呢?佢就成為左Bollywood一個大導演,並獲得印度奧斯卡最佳導演,更拍左一套咁出色既電影。


我係呢套戲入面學到D咩? 讀書係唔能夠死記一定既公式或者句子,而係應該去明白當中既用法同當中既意思,咁樣日後真正先可以係需要時用番出黎。

The Nok 提到...

> 而因為咁香港大學先收佢。

咁大學都叫做收左佢呀,咪幾好,咁仲有咩問題?

> 唔通你會想睇一套電影係咁:有個聰明人出世,但係佢好窮,冇奇遇,冇書讀,冇野食,冇水飲,之後你就大噗一句,呢套戲真夠寫實!

所以咪話你一直都唔明我篇評論講咩囉,一個超勁既人成功左,有咩咁勵志呢?一個普通人,失敗左,但依然可以快樂,呢d 先叫勵志,呢個就係文章既中心。

XXX

> 讀書係唔能夠死記一定既公式或者句子,而係應該去明白當中既用法同當中既意思,咁樣日後真正先可以係需要時用番出黎。

每年全港有12萬會考生,當中有八成人都識唔晒d 公式或句子,部份內容要靠死記,點安慰佢地好?

wizh 提到...

等我回一下看看我有多了解,有錯請指教

樓主認為的勵志,不應該放在懷才不遇最後成功的故事上,這跟社會的多數人不一樣。跟社會現實脫軌

今時今日的勵志應該是堅持自己所熱愛的,不求結果的追求理想,結果是快樂而不用被社會的價值觀所認同/同化

以下是我的見解:
現今社會只會標簽成功﹠失敗者。當你想被社會認同,就需要(3idiots)這種夢。因他們仍希望成功,向其他人交代,然而很多人都應為自己是懷才不遇的,所以仍有人會覺得很勵志。對我而言,this is just a simple bollywood movie。另,我也受不了那些歌舞

Michael 提到...

套戲的敗筆就是最後還是以世俗價值觀(拿了幾百個專利,無憂無慮地過日子),去證明主角的正確性。

結果就是:"嗱...無論你的思想係幾偉大都好,只有"成功"了,別人才會當你是一回事。"

但配角跳樓咁都唔死,另一個用買notebook的錢買相機都可以做到野生攝影師,那都是小概率的事件,好不好?

顏回的"一簞食,一瓢飲,回也不改其樂。"這種故事拍成電影,絶不會當成是勵志片呢。